الرئيسية » المطبخ » محشى ورق العنب

محشى ورق العنب

المقادير

نصف كيلو ورق عنب
للخلطة هنحتاج
3 كوب رز مصرى
7 طماطم
3 معالق كبار صلصة
2 حزمة كسبرة خضراء
حزمة بقدونس
حزمة شبت
ربع كوب زيت
بصلة كبيرة
عصير 2 ليمونه
توابل الخلطة / فلفل اسود _ رشة شطة _ بهارات _ قرفة _ كمون _ كسبرة ناشفة
وللتسوية هنحتاج
2 كوب شوربة فراخ او لحمة
2 ملعقة كبيرة سمنة

طريقة عمل محشى ورق العنب

هنسلق الورق بعد مانوضبه ونشيل العروق منه، هنسلقة لمدة اقل من دقيقة عشان ميتهريش ويتقطع مننا واحنا بنلفه وممكن نغطسه فى مياه مغلية ونطلعه هنسيبه يبرد خالص.

هنحضر الخلطة المتسبكه
********************

1_ ممكن نفس الخلطه دى نعملها نى × نى من النارودى اللى انا بفضلها وبعملها على طول.
2_ طريقه التانيه التسبيكه هنبشر البصل ونحطه على النار مع الزيت ونقلبهم هنضرب الطماطم فى الخلاط ونصفيها ونحطها على البصل لما لونه يصفر لغاية ماتتسبك هنطفى النار ونقطع الكسبرة والبقدونس والشبت ونحطهم على البصل والطماطم ونقلبهم ونحط عليهم الرز المغسول والتوابل، ونقلبهم كويس ونسيبهم يبردوا هنجيب اى ورقة من ورق العنب اللى سلقناه وهنحطها على طبق والعروق الخشنة اللى فى الورقة هى اللى هتبقى مواجهة لينا وهنحط عليها الرز ونحط فى اول الورقة كمية الخلطة المناسبة حسب حجم الورقة، وهنطوى جناب الورقة على الخلطة، وهنمسك الخلطة بالورقة ونضغط عليهم واحنا بنلف عشان المحشى يبقى متماسك.
نجيب الحله ونرص فى قعها شرايح بصل وطماطم وعيدان الورق عشان دول بيعطوا للطعم حموضة ونكهة حلوة، ونرص المحشى بشكل دائرى لما نخلص لف نسيب مسافة فى الحلة من فوق عشان لسه هنحط شوربة وحجم المحشى هيتضاعف اخر خطوة عصير ليمونتين على الوجه، ثم نيجى بقى لسواء المحشى هنسخن الشوربة اللى هنسقى بيها المحشى وقبل مانحط الشوربة هنحط الحلة على النار وعلى وشها معلقتين كبار سمنة ونغطيها ونسيبها على النار لمدة 10 دقايق وبعد كده نحط الشوربة بعد ماتكون غليت وطبعا الشوربة هتغطى ورق العنب، ونجيب طبق يكون على قد الحلة ونحطه فوق المحشى والخطوة دى مهمة لأن الطبق ده بيضغط الشوربة مع البخار ويخلى المحشى يستوى كويس ونسيبه على نار هادية لغاية مايستوى وطبعا كل فترة هنختبر سواه، وبالف هنا.